मुंबई : मुंबईकरांची रविवारची सकाळही उकाड्याने झाली. सामान्यत: मे महिन्यात, पावसाळ्याआधी येणारा हा अनुभव एप्रिलच्या पहिल्या आठवड्यातच आल्याचे निरीक्षण मुंबईकरांनी नोंदवले. सोमवार ते बुधवार हे तीन दिवस मुंबईत उकाड्याचा अनुभव येण्याची शक्यता आहे. मुंबईसह कोकण विभागाच्या उर्वरित जिल्ह्यांमध्येही उष्ण आणि आर्द्र हवा ९ एप्रिलपर्यंत असेल. १० एप्रिलपासून हवा कोरडी होण्याची शक्यता आहे.

कोकण विभागाच्या सर्वच जिल्ह्यांसाठी ९ एप्रिलपर्यंत उष्ण आणि आर्द्र हवेसाठी ‘यलो ॲलर्ट’ जारी केला आहे. मुंबईमध्ये सांताक्रूझ येथे रविवारी २४.१ अंश सेल्सिअस, तर कुलाबा येथे २५.५ अंश सेल्सिअस किमान तापमान होते. दोन्ही केंद्रांवर आर्द्रता सकाळच्या वेळी ८५ टक्क्यांच्या पुढे होती. त्यामुळे सकाळच्या वेळीही असह्य उकाड्याची जाणीव होत होती. दिवसभरात सांताक्रूझ केंद्रावर ३३.८, तर कुलाबा केंद्रावर ३३.७ अंश सेल्सिअस कमाल तापमानाची नोंद झाली. दिवसभरात तापमानाचा पारा सांताक्रूझ केंद्रावर सरासरीच्या आसपास असला, तरी दिवसभर आर्द्रतेमुळे अस्वस्थता अधिक होती.

प्रादेशिक हवामान विभागाच्या अंदाजानुसार, सोमवार ते बुधवार या कालावधीत मुंबईचे कमाल तापमान ३६ ते ३७ अंश सेल्सिअसच्या दरम्यान असू शकेल. किमान तापमानाचा पाराही आर्द्रतेमुळे चढा राहील. त्यामुळे मुंबईकरांनी उन्हापासून तसेच उकाड्यापासून संरक्षणासाठी योग्य काळजी घेण्याचे आवाहन हवामान विभागातर्फे करण्यात आले आहे. १० एप्रिलनंतर आर्द्र आणि उष्ण वातावरणामुळे होणारा मुंबईकरांचा त्रास कमी होण्याची शक्यता आहे.

राज्यात सलग तीन-चार दिवस झालेल्या अवकाळी पावसानंतर आर्द्रतेत घट होत कमाल व किमान तापमानासह उष्ण वाऱ्यांच्या वेगात वाढ झाल्याने रविवारी नाशिकमधील तापमानाने चाळिशी ओलांडली. पारा ४०.२ अंश सेल्सिअसपर्यंत पोहोचला. मालेगावचेही तापमान ४०.६ अंशांपर्यंत गेले. एप्रिलच्या सुरुवातीलाच तापमान इतके वाढल्याने पुढील दोन आठवडे उकाडा तीव्र राहण्याचा अंदाज हवामान विभागाने वर्तवला आहे, नाशिकमध्ये सन २०२५मधील हंगामातील उच्चांकी तापमानाची नोंद रविवारी करण्यात आली.

सकाळी १२ टक्के, तर दुपारी ४५ टक्के आर्द्रता

१५ एप्रिल २०२४ रोजी नाशिकमध्ये ४० अंश सेल्सिअस तापमान

१० मे २०२३ रोजी नाशिकमध्ये ४०.२ अंश सेल्सिअस तापमान

पुणे शहरात दोन दिवस झालेल्या पावसामुळे नागरिक सुखावले; पण रविवारी पुन्हा उन्हाची तीव्रता वाढल्यामुळे रस्त्यावरून फिरताना उन्हाच्या चटक्यांना सामोरे जावे लागले. रविवारी दिवसभरात पाषाणमध्ये ४१.४ अंश सेल्सिअस या हंगामातील शहरातील उच्चांकी तापमान नोंदविण्यात आले.लोहगावमध्ये ४१, कोरेगाव पार्क येथे ४०.२ आणि शिवाजीनगर ३९.२ अंश सेल्सिअस तापमानाची नोंद झाली. 

पुण्यासह राज्याच्या बहुतांश भागांत कमाल तापमानात लक्षणीय वाढ नोंदविण्यात आली. मालेगाव, नाशिक, सोलापूर, औरंगाबाद, परभणी, अमरावती, चंद्रपूर, नागपूर, गोंदिया, यवतमाळ, वर्धा येथे पारा चाळीस अंशांच्या पुढे गेला होता. राज्यातील उच्चांकी तापमान ४३.२ अंश सेल्सिअस अकोल्यात आणि नीचांकी तापमान १७.४ अंश सेल्सिअस अहिल्यानगरमध्ये नोंदविण्यात आले. पुढील दोन आकाश निरभ्र राहणार असून, तापमानही ४० अंशांच्या जवळ स्थिर राहणार असल्याचा अंदाज भारतीय हवामानशास्त्र विभागाने व्यक्त केला आहे.