सातारा : सातारा रनर्स फाऊंडेशनच्या वतीने दरवर्षी आयोजित करण्यात येणार्‍या देशातील लोकप्रिय आणि प्रतिष्ठेच्या सातारा हिल हाफ मॅरेथॉन 2026 च्या ऑफिशियल टी-शर्ट, मेडल आणि थीम सॉंगचे दिमाखदार अनावरण रविवारी सातारा क्लब येथे उत्साहपूर्ण वातावरणात पार पडले. संडे लॉंग रन च्या निमित्ताने आयोजित करण्यात आलेल्या या दिमाखदार सोहळ्यात सुमारे 500 हून अधिक धावपटूंनी उत्स्फूर्त सहभाग नोंदविला.

कार्यक्रमाची सुरुवात राष्टत्र्वगीताने झाली, त्यानंतर संयोजन समितीचे अध्यक्ष आर्किटेक्ट उपेंद्र पंडित यांनी 

कार्यक्रमाचे प्रास्ताविक केले. त्यांनी यंदाच्या स्पर्धेची वैशिष्ट्ये, नियोजन आणि तयारीसंबंधी माहिती देताना, सातारा हिल हाफ मॅरेथॉनमध्ये सहभागी होणार्‍या प्रत्येक स्पर्धकाला दरवर्षी उत्कृष्ट दर्जाचे, आकर्षक रंगसंगतीचे टी-शर्ट दिले जातात आणि असे टी-शर्ट परिधान करून धावणे हा प्रत्येक धावपटूसाठी अभिमानाचा आणि आनंदाचा क्षण असल्याचे सांगितले.

सातारा हिल हाफ मॅरेथॉनचा गेल्या 15 वर्षांचा प्रवास हा केवळ आयोजन समितीच्या प्रयत्नांचा परिणाम नाही, तर अनेकांचा विश्‍वास, सहकार्य आणि प्रेमातून घडलेली ही एक भव्य चळवळ आहे. राजाश्रय आणि लोकाश्रय लाभला की कोणताही उपक्रम केवळ यशस्वी होत नाही, तर तो इतिहास घडवतो, याबाबत आपली मॅरेथॉन हे उत्तम उदाहरण आहे.

आजवर आमच्या या उपक्रमाला खा. श्री. छ. उदयनराजे भोसले आणि सार्वजनिक बांधकाम मंत्री श्री. छ. शिवेंद्रसिंहराजे भोसले यांचे कायमच मोलाचे सहकार्य लाभत आले आहे. त्याबरोबरच जिल्हा प्रशासनाचे देखील आजवर अतिशय मोलाचे योगदान राहिले आहे. विशेषतः जिल्हाधिकारी कार्यालय, सातारा जिल्हा पोलीस प्रशासन आणि सातारा नगरपालिका यांचे भक्कम पाठबळ, देशभरातील हजारो धावपटूंचा उत्स्फूर्त सहभाग आणि सातारा जिल्ह्यातील जनतेचे प्रेम, आपुलकी आणि पाठिंबा यामुळेच सातारा हिल हाफ मॅरेथॉनने आज राष्टत्र्वीय आणि आंतरराष्टत्र्वीय स्तरावर आपली वेगळी ओळख निर्माण केली आहे.

यानंतर संयोजन समितीचे उपाध्यक्ष विशाल ढाणे यांनी सातारा रनर्स फाऊंडेशनच्या सामाजिक बांधिलकीची माहिती दिली. इंडिया केअर फाऊंडेशन या सह भागीदारांच्या माध्यमातून जिल्हा परिषदेच्या सांबरवाडी, यवतेश्‍वर, गोळीबारनगर, कृष्णानगर, विक्रांतनगर, कण्हेर (जांभळेवाडी) तसेच सदरबझार येथील तक्षशीला शाळा आणि बापूसाहेब चिपळूणकर मराठी शाळा अशा एकूण आठ शाळांना क्रीडा साहित्य भेट देण्यात आल्याची माहिती त्यांनी दिली. तसेच तीन शाळांमध्ये लहान मुलांसाठी मंकी बार्स (व्यायामशाळा) उभारण्यात आल्याचे सांगितले. यावेळी संबंधित शाळांच्या मुख्याध्यापकांचा सत्कार, जिल्हा पोलीस अधीक्षक निखील पिंगळे यांच्या हस्ते करण्यात आला. 

सातारा हिल हाफ मॅरेथॉनचे संस्थापक अध्यक्ष डॉ. संदीप काटे यांनी यंदाच्या मॅरेथॉनच्या थीम सॉंगमागील संकल्पना स्पष्ट केली. गेल्या 14 वर्षांत सातारा हिल हाफ मॅरेथॉनने देशभरातील धावपटूंचा विश्‍वास संपादन केला असून, यंदाची मॅरेथॉन अधिक भव्य आणि संस्मरणीय करण्यासाठी संपूर्ण टीम कार्यरत असल्याचे त्यांनी सांगितले.

याप्रसंगी रविंद्र नलवडे यांनी खास पीबीजी सातारा हिल हाफ मॅरेथॉनसाठी लिहिलेल्या व संगीतबद्ध केलेल्या अधिकृत थीम सॉंगचे अनावरण करण्यात आले. त्याबद्दल त्यांचा जिल्हा पोलीस अधीक्षक निखील पिंगळे यांच्या हस्ते सत्कार करण्यात आला.

यंदाचे वर्ष पीबीजी सातारा हिल हाफ मॅरेथॉनसाठी विशेष महत्त्वाचे असून मॅरेथॉनचे हे 15 वे पर्व आहे. या पर्वानिमित्त धावपटूंचा उत्साह वाढविण्यासाठी आणि सातार्‍याचे नाव जागतिक स्तरावर पुन्हा एकदा उज्ज्वल करण्याच्या उद्देशाने यावर्षी स्वतःच्याच गिनीज वर्ल्ड रेकॉर्डला मागे टाकण्याचा निर्धार सातारा रनर्स फाऊंडेशनने केला आहे. या ऐतिहासिक प्रयत्नात हजारो धावपटूंनी सहभागी होऊन नवा जागतिक विक्रम प्रस्थापित करण्याचे आवाहनही डॉ. संदीप काटे यांनी यावेळी केले.

या वर्षीच्या मॅरेथॉनचे मुख्य प्रायोजक असलेल्या पुनीत बालन ग्रुपचे स्पोर्ट्स मॅनेजर आनंद ओझा, टेक्नोस्पोर्टचे डायरेक्टर संदीप झुनझुनवाला, पुष्पेन मेथी, बँकिंग पार्टनर एयू स्मॉल फायनान्स बँकेचे क्लस्टर हेड शैलेश नांद्रे, सातारा शाखेचे शाखाधिकारी प्रदीप गुरव, पेन रिलीफ पार्टनर झंडूचे गणेश भागवत, हायड्रेशन पार्टनर पोकारी स्वेट ग्रुपच्या डायरेक्टर कु. श्रीया शेट्टी, मेडिकल पार्टनर पल्स हॉस्पिटलचे संस्थापक डॉ. ओंकार पाटील, सह संस्थापक डॉ. कौशिक पाटील, रेडिओ पार्टनर बिग एफएम, वॉटर पार्टनर ऑक्सीरिच, रिकव्हरी पार्टनर हायपर आईस, फिलॉन्थ्रापी पार्टनर इंडिया केअर्स फौंडेशनच्या संचालिका मीना दवे, ब्रॅण्डिंग पार्टनर असलेला ब्डनशिया ग्रुपच्या हिरल, टेक्नॉलॉजी पार्टनर - सर्वार्थ, फोटोग्राफी पार्टनर वन ग्लिंट, टायमिंग पार्टनर, स्पोर्ट टायमिंग सोल्यूशन इत्यादी प्रायोजक या कार्यक्रमाला उपस्थित होते. 

तसेच सातारा क्लबचे पदाधिकारी, विविध क्षेत्रातील मान्यवर आणि मोठ्या संख्येने धावपटूंनी या कार्यक्रमाला उपस्थिती लावली.

यावेळी बोलताना सातारा जिल्हा पोलीस अधीक्षक निखिल पिंगळे यांनी सातारा रनर्स फाऊंडेशनच्या कार्याचे कौतुक करत, पीबीजी सातारा हिल हाफ मॅरेथॉन ही केवळ स्पर्धा नसून फिटनेस आणि समाजसेवेचा संदेश देणारा उत्सव आहे असे गौरवोद्गार काढले. पिंगळे यांनी संस्थापक अध्यक्ष डॉ. संदीप काटे आणि संपूर्ण टीमचे अभिनंदन करत, या मॅरेथॉनच्या यशासाठी आवश्यक ते सर्व सहकार्य पोलिस प्रशासनाकडून कायम राहील असा विश्‍वास व्यक्त केला.

यावर्षीच्या टी-शर्ट हा टेक्नोस्पोर्ट या नामांकित कंपनीने धावपटूंच्या गरजा लक्षात घेऊन तयार केला असून हा टी-शर्ट खूप हलका आणि पटकन सुकणारा आहे. 

पेस फॉर पीस ही या वर्षीची थीम असून या वर्षीचा टी-शर्ट आणि मेडल ही दोन्ही या वर्षीची खास ओळख असणार आहे.

याप्रसंगी सातारा हिल हाफ मॅरेथॉनचे संस्थापक अध्यक्ष डॉ. संदीप काटे, संयोजन समितीचे अध्यक्ष आर्किटेक्ट उपेंद्र पंडित, रेस डायरेक्टर डॉ. अविनाश शिंदे, जॉईंट रेस डायरेक्टर डॉ. दीपक बनकर, उपाध्यक्ष विशाल ढाणे, सेक्रेटरी शैलेश ढवळीकर, खजिनदार राहुल घायताडे, तसेच संस्थापक सदस्य डॉ. प्रतापराव गोळे, ऍड. कमलेश पिसाळ, डॉ. चंद्रशेखर घोरपडे, डॉ. सुचित्रा काटे, डॉ. देवदत्त देव, अभिषेक भंडारी, डॉ. पल्लवी पिसाळ, भाग्यढाणे, डॉ. दीपक थोरात, डॉ. अदिती घोरपडे, डॉ. रंजिता गोळे, डॉ. अश्‍विनी देव, केतकी पंडित, सीएस नेहा दोशी, डॉ. कविता बनकर, श्रुती भंडारी, भाविका मुथा, डॉ. विकास पाटील, दिनेश उधाणी, डॉ. कैलास खडतरे, आर्किटेक्ट नितीन किरवे, पंकज नागोरी, प्रफुल्ल पंडित, सारंग गुजर, निशाद पंडित, निरंजन पिसे, जयंत शिवदे, सागर निंबाळकर, माधुरी शिवदे त्याचबरोबर सातारा शहर व परिसरातील अनेक धावपटू, तसेच स्पर्धेदिवशी महत्त्वाची भूमिका बजावणाऱी पेसर्सची टीम, हितचिंतक, तसेच स्पर्धेला वेळोवेळी सहाय्य करणारे सातारा येथील स्वयंसेवकही यावेळी उपस्थित होते.

तसेच ऍब्डनशिया या ब्रँडिंग पार्टनरची संपूर्ण टीम आणि सातारा शहर व परिसरातील मोठ्या संख्येने धावपटू उपस्थित होते.

कार्यक्रमाचे सूत्रसंचालन सीएस नेहा दोशी यांनी केले, तर आभार प्रदर्शन संयोजन समितीचे सेक्रेटरी शैलेश ढवळीकर यांनी केले.