सातारा : सातारा शहरातील शिवतीर्थ परिसरात भर पावसात फ्लेक्स स्ट्रक्चर उभारण्याच्या कामाला सामाजिक कार्यकर्ते सुशांत मोरे यांनी तीव्र विरोध केला. या कामाविरोधात त्यांनी शिवतीर्थसमोर उपोषण सुरू करत पालिका प्रशासन आणि पदाधिकाऱ्यांवर जोरदार टीका केली.

"पालिकेचे पदाधिकारी एसीमध्ये बसतात, पण नागरिकांच्या प्रश्नांसाठी कधीही रस्त्यावर उतरून पाहत नाहीत," असा आरोप सुशांत मोरे यांनी केला. भर पावसात सुरू असलेल्या कामामुळे नागरिकांच्या सुरक्षिततेचा प्रश्न निर्माण झाल्याचे त्यांनी सांगितले.

दरम्यान, या प्रकरणावर पालिकेच्या अधिकाऱ्यांनी स्पष्टीकरण देताना संबंधित फ्लेक्स स्ट्रक्चर उभारणारी कंपनी अनेक ठिकाणी ब्लॅकलिस्टेड असल्याची माहिती दिली. त्यामुळे या कामाबाबत पुढे कोणता निर्णय घेतला जाणार, याकडे नागरिकांचे लक्ष लागले आहे.

मुंबईतील मोठे होर्डिंग कोसळून अनेकांचा मृत्यू झाल्याची दुर्घटना ताजी असतानाच, पावसाळ्याच्या पार्श्वभूमीवर साताऱ्यातही फ्लेक्स स्ट्रक्चर उभारण्याचे काम सुरू असल्याने नागरिकांमध्ये चिंता व्यक्त होत आहे.

दरम्यान, मुसळधार पावसात पोवई नाका परिसरात होर्डिंग उभारण्याचे काम सुरू असल्याचे निदर्शनास आल्यानंतर सामाजिक कार्यकर्ते सुशांत मोरे यांनी घटनास्थळी जाऊन भर पावसात आंदोलन सुरू केले. त्यांच्या आंदोलनानंतर संबंधित ठिकाणचे काम बंद करण्यात आले आहे.