सातारा : श्रीमंत छत्रपती प्रतापसिंह महाराज थोरले नगर वाचनालय, सातारा येथे राजर्षी छत्रपती शाहू महाराज यांच्या जयंतीनिमित्त त्यांच्या प्रतिमेस पुष्पहार अर्पण करून अभिवादन करण्यात आले.

यावेळी विनय गदो, वाचनालयाच्या कार्यवाह वैदेही कुलकर्णी, लेखक डॉ. राजेंद्र माने, ग्रंथालयातील कर्मचारी तसेच सभासद उपस्थित होते.

याप्रसंगी उपस्थितांनी राजर्षी छत्रपती शाहू महाराज यांच्या सामाजिक, शैक्षणिक आणि लोककल्याणकारी कार्याचा गौरव केला. सामाजिक समता प्रस्थापित करण्यासाठी त्यांनी आयुष्यभर कार्य केले. शिक्षणाचा प्रसार व्हावा यासाठी त्यांनी प्राथमिक शिक्षण मोफत केले तसेच विद्यार्थ्यांच्या सोयीसाठी कोल्हापूर येथे वसतिगृहांची उभारणी केली. राजा असूनही सर्वसामान्य जनतेशी त्यांनी जिव्हाळ्याचे संबंध ठेवले. त्यामुळेच त्यांना 'लोकराजा' म्हणून ओळखले जाते.

कार्यक्रमाच्या शेवटी उपस्थितांनी राजर्षी छत्रपती शाहू महाराज यांच्या कार्याला अभिवादन करून त्यांच्या विचारांचा समाजात प्रसार करण्याचा संकल्प व्यक्त केला.