सातारा : सातारा जिल्ह्यातील आरोग्य सेवेला नवी दिशा देणारा महत्त्वाकांक्षी उपक्रम म्हणून रोटरी क्लब सातारा कॅम्प आणि रोटरी क्लब ऑफ ईस्ट नासाऊ यांच्या सहकार्याने सुमारे ५० लाख रुपये खर्चून उभारण्यात आलेल्या अत्याधुनिक रक्तघटक विलगीकरण (Blood Component Separation) केंद्राचे लोकार्पण मंगळवार, ३० जून रोजी दुपारी ३ वाजता सातारा जिल्हा शासकीय रुग्णालय (सिव्हिल हॉस्पिटल) व माऊली ब्लड बँकेच्या सेमिनार हॉलमध्ये होणार आहे.

रोटरी क्लब सातारा केंद्र गेली अनेक वर्षे निःस्वार्थ समाजसेवा आणि रक्तदान चळवळ प्रभावीपणे राबवत आहे. मात्र, सातारा जिल्ह्यात अत्याधुनिक रक्तघटक विलगीकरण केंद्राची सुविधा उपलब्ध नसल्यामुळे गंभीर रुग्णांना आवश्यक रक्तघटक वेळेवर मिळण्यात अडचणी येत होत्या. त्यामुळे अनेक रुग्णांना उपचारासाठी इतर शहरांकडे धाव घ्यावी लागत होती.

नवीन केंद्रामध्ये अत्याधुनिक ब्लड कॉम्पोनंट सेपरेटर, डीप फ्रीझर, संगणक प्रणाली, जनरेटर, एअर कंडिशनिंगसह इतर आवश्यक वैद्यकीय उपकरणांची सुविधा उपलब्ध करण्यात आली आहे. या सुविधेमुळे अपघातग्रस्त, गंभीर आजारी रुग्ण, माता व बालक तसेच शस्त्रक्रियांसाठी आवश्यक असणारे रक्तघटक वेळेत उपलब्ध होणार असून जिल्ह्यातील आरोग्य सेवेला मोठा दिलासा मिळणार आहे.

या लोकार्पण सोहळ्यास रोटरी डिस्ट्रिक्ट ३१३२ चे डिस्ट्रिक्ट गव्हर्नर रोटे. सुधीर लातूरे, डिस्ट्रिक्ट रोटरी फाउंडेशन रोटे.स्वाती हेरकल, जिल्हाधिकारी डॉ. संतोष पाटील, जिल्हा पोलीस अधीक्षक निखिल पिंगळे, सिव्हिल सर्जन डॉ. शरद जाधव यांच्यासह अनेक मान्यवर उपस्थित राहणार आहेत.

या उपक्रमासाठी रो सचिन शेळके, रो सचिन कलानी आणि रो शंकर गोसावी यांनी विशेष योगदान दिले आहे. या ऐतिहासिक उपक्रमाच्या लोकार्पण सोहळ्यास नागरिक, सामाजिक संस्था, रक्तदाते आणि हितचिंतकांनी मोठ्या संख्येने उपस्थित राहून कार्यक्रमाची शोभा वाढवावी, असे आवाहन रोटरी रक्त सातारा केंद्राच्या अध्यक्षा नीलिमा निकम, सचिव वैशाली निंबाळकर यांनी केले आहे.