सातारा : जिल्ह्यात सुरू असलेल्या विशेष सघन मतदार पुनरिक्षण (Special Intensive Revision-SIR) मोहिमेंतर्गत प्रत्येक नोंदणीकृत मतदाराने 'इन्युमरेशन फॉर्म' वेळेत भरून जमा करणे अत्यावश्यक असल्याचे आवाहन सहायक मतदार नोंदणी अधिकारी तथा मुख्याधिकारी विनोद जळक यांनी केले आहे. फॉर्म न भरल्यास अथवा पडताळणी प्रक्रियेत सहकार्य न केल्यास मतदार यादीतील नावाच्या पडताळणीवर परिणाम होऊन पुढील कार्यवाहीला सामोरे जावे लागू शकते, असा इशाराही त्यांनी दिला.

भारत निवडणूक आयोगाच्या निर्देशानुसार ३० जून ते २९ जुलै या कालावधीत ही विशेष मोहीम राबविण्यात येत आहे. यामध्ये बूथ लेव्हल अधिकारी (बीएलओ) प्रत्येक मतदाराच्या घरी जाऊन फॉर्मचे वितरण व संकलन करत आहेत. संबंधित मतदार घरी उपलब्ध नसल्यास बीएलओ तीन वेळा भेट देतील. त्यानंतरही संपर्क न झाल्यास घरावर नोटीस लावली जाईल. पुढेही प्रतिसाद न मिळाल्यास निवडणूक आयोगाच्या नियमानुसार संबंधित नावाबाबत आवश्यक प्रक्रिया राबविण्यात येणार आहे.

इन्युमरेशन फॉर्ममध्ये मतदाराचे नाव, जन्मतारीख अथवा वय, संपूर्ण पत्ता, मोबाईल क्रमांक, कुटुंबातील सदस्यांची माहिती, छायाचित्र पडताळणी तसेच आधार क्रमांक (ऐच्छिक) यासह आवश्यक तपशील भरावा लागणार आहे. सर्व माहिती अधिकृत कागदपत्रांशी सुसंगत असावी आणि फॉर्मवर मतदाराची स्वाक्षरी असणे आवश्यक आहे.

प्रत्येक पात्र मतदाराने स्वतंत्र फॉर्म भरायचा असून मतदान ओळखपत्र (EPIC), रहिवासी पुरावा, जन्मतारीख अथवा वयाचा पुरावा, अलीकडील छायाचित्र तसेच आधार कार्ड (ऐच्छिक) ही कागदपत्रे तयार ठेवावीत, असेही प्रशासनाने स्पष्ट केले आहे.

बीएलओमार्फत घरपोच सेवा उपलब्ध असली तरी मतदारांना voters.eci.gov.in या मतदार सेवा पोर्टलवर किंवा Voter Helpline मोबाईल ॲपद्वारेही ऑनलाइन फॉर्म भरून आवश्यक कागदपत्रे अपलोड करता येणार आहेत. याशिवाय जिल्ह्यात विविध ठिकाणी विशेष शिबिरांचे आयोजन करण्यात आले असून प्रत्येक पात्र मतदाराने वेळेत फॉर्म भरून मतदार यादी अद्ययावत करण्याच्या प्रक्रियेत सहकार्य करावे, असे आवाहन सहायक मतदार नोंदणी अधिकारी विनोद जळक यांनी केले आहे.