मुंबई : विधान परिषदेच्या निकालानंतर भाजप आणि शिंदे गट यांच्यात तीव्र वाद पेटला आहे. पराभवाचे खापर भाजपने शिवसेनेचे (शिंदे गट) रवींद्र धंगेकर यांच्यावर फोडले, त्यांनी भाजप उमेदवाराच्या विरोधात काम केल्याचा आरोप केला. धंगेकरांनीही राज्यातील नेतृत्वावर प्रश्नचिन्ह उपस्थित करत एकनाथ शिंदे यांना मुख्यमंत्री करण्याची मागणी केली. यामुळे सत्ताधारी महायुतीमधील अंतर्गत दुफळी उघड झाली असून राजकीय संघर्ष वाढला आहे.

विधानपरिषदेच्या शिक्षक आणि पदवीधर मतदारसंघाच्या 5 जागांसाठी झालेल्या निवडणुकीत महायुतीला मोठा धक्का बसला आहे. 5 पैकी 3 जागांवर मविआचा तर अवघ्या 2 जागांवर महायुतीचा विजय झाला आहे. निवडणुकीतील या अपयशानंतर भाजपनं थेट शिंदेंच्या शिवसेनेवर निशाणा साधत पराभवाचं खापर फोडलंय. नवनाथ बन यांनी पत्रकार परिषद घेत शिवसेनेच्या धंगेकरांवर आरोपांची तोफ डागली आहे. महायुतीविरोधात काम करणाऱ्या धंगेकरांवर शिंदे कारवाई करणार का? असा सवाल बन यांनी विचारलाय. तर धंगेकरांनी थेट राज्याचं नेतृत्व बदलण्याची मागणी करत शिंदेंना सीएम करा, असं वक्तव्य केलंय. त्यामुळे सत्ताधाऱ्यांमधला हा वाद आणखी पेटण्याची शक्यता आहे.

शिंदे गटाचे नेते रवींद्र धंगेकर यांनी निवडणुकीनंतर प्रतिक्रिया दिली होती. एकनाथ शिंदे हे शिवसेना पक्षाचे नेते आहेत, हे आता नवनाथ बन यांना समजलं का? हे निवडणुकीच्या आधी त्यांना समजायला हवं होतं. राज्यातील नेतृत्त्वार नाराजी आहे. त्यामुळे राज्यातील नेतृत्त्व बदलायला हवं. राज्याचे मुख्यमंत्री एकनाथ शिंदे पाहिजेत, असं रवींद्र धंगेकर यांनी म्हटलं आहे.