सातारा : सातारकरांसाठी नव्हे तर संपूर्ण महाराष्ट्राची अस्मिता असणाऱ्या छत्रपती शिवरायांच्या साताऱ्यातील पोवई नाक्यावरील लढवय्या आवेशातील एकमेव शिवपुतळ्याची उंची वाढवण्याच्या कामाला प्रत्यक्ष सुरुवात होणार आहे. या कामासंदर्भात शिल्पज्ञ अनिल सुतार व सार्वजनिक बांधकाम मंत्री शिवेंद्रसिंहराजे भोसले यांनी आज या पुतळा परिसराची पाहणी करून त्या संदर्भात चर्चा केली. सातारा नगरपालिका प्रशासकीय आणि तांत्रिक मंजुरी घेऊन 19 फेब्रुवारी रोजी शिवजयंतीच्या मुहूर्तावर प्रत्यक्ष या कामाचे भूमिपूजन होणार आहे. या आराखड्यासाठी अडीच कोटी रुपये खर्च येणार आहे.

गेल्या दहा वर्षांमध्ये सातारा शहराचे वेगाने विस्तारीकरण होत आहे. सातारा शहराच्या मध्यवर्ती ठिकाणी असणाऱ्या छत्रपती शिवरायांचा तोफेवर हात ठेवलेला लष्करी गणवेशातील एकमेव पुतळा आहे. या पुतळ्याची उंची वाढवण्या संदर्भात गेल्या काही वर्षापासून चर्चा सुरू होती. आता येत्या 19 फेब्रुवारी रोजी या कामाचे प्रत्यक्ष भूमिपूजन केले जाणार असल्याची माहिती सार्वजनिक बांधकाम मंत्री शिवेंद्रसिंहराजे भोसले यांनी दिली. यासंदर्भात त्यांनी शिल्पज्ञ अनिल सुतार यांच्याशी पोवई नाका परिसरातील शिवतीर्थावर आज सकाळी चर्चा केली. यावेळी नगराध्यक्ष अमोल मोहिते, प्रभारी मुख्याधिकारी अभिजीत बापट, अविनाश कदम, एडवोकेट दत्ता बनकर, सुशांत महाजन, हेमलता भोसले नगराध्यक्षांचे स्वीय सहाय्यक श्रीकांत गोडसे तसेच इतर मान्यवर उपस्थित होते.

नवीन पुतळ्याचा चबुतरा, त्याचबरोबर नवीन पुतळ्याची रचना त्याचा संकल्पित आराखडा मूर्तीमध्ये करावयास लागणारे थोडेसे बदल आणि स्ट्रक्चरल ऑडिटिंग या विषयावर शिवेंद्रसिंहराजे यांनी अनिल सुतार यांच्याकडून माहिती घेतली. या कामासंदर्भात सातारा नगरपालिका तांत्रिक आणि प्रशासकीय मंजुरी घेऊन या कामाची प्रत्यक्ष निविदा प्रसिद्ध करणार आहे. तसेच यासंदर्भात नागरिकांच्या हरकती व सूचना मागितल्या जाणार असून अभ्यासपूर्ण सूचनांचा विचार केला जाणार असल्याचे अभिजीत बापट यांनी सांगितले. या आराखड्यामध्ये चबुतऱ्याची उंची 15 फूट तर प्रत्यक्ष पुतळ्याची उंची ही 25 फूट असणार आहे. शिव पुतळ्याला अभिवादन करण्यासाठी स्वतंत्र हायड्रोलिक क्रेन बकेटची सुविधा केली जाणार आहे. तसेच नाक्यावरील छत्रपती शिवरायांचा पुतळा हा तांत्रिक परवानग्यानंतर येथील अजिंक्यतारा किल्ल्यावर सुस्थितीत समुद्रा बांधून तेथे स्थापित केला जाणार आहे. याबाबतचा आराखडा बनवण्याची काम सुद्धा सुरू केल्याचे मुख्याधिकारी अभिजीत बापट यांनी सांगितले. येत्या 19 फेब्रुवारी रोजी शिवजयंती चे सर्व कार्यक्रम पार पाडल्यानंतर सायंकाळी प्रत्यक्ष भूमी पूजन करून या पुतळ्याच्या कामाला सुरुवात होणार असल्याचे शिवेंद्रसिंहराजे भोसले यांनी पत्रकारांशी बोलताना सांगितले आहे.