सातारा : सातारा जिल्हा मध्यवर्ती सहकारी बँकेच्या संचालक मंडळाच्या निवडणुकीसाठी प्रशासन सज्ज झाले आहे. रविवार, दि. 1 नोव्हेंबर रोजी सकाळी 8 ते सायंकाळी 5 या वेळेत जिल्ह्यातील 11 तालुक्यांमध्ये प्रत्येकी एका मतदान केंद्रावर मतदान प्रक्रिया पार पडणार आहे. या निवडणुकीत एकूण 2 हजार 21 मतदार मतदानाचा हक्क बजावणार असून, मतदान प्रक्रिया सुरळीत आणि शांततेत पार पाडण्यासाठी प्रशासनाने 115 कर्मचाऱ्यांची नियुक्ती केली आहे.

मतदानाच्या पार्श्वभूमीवर प्रशासनाकडून आवश्यक तयारी पूर्ण करण्यात आली आहे. नियुक्त कर्मचारी शनिवारी आपापल्या नेमून दिलेल्या मतदान केंद्रांवर रवाना होणार आहेत. मतदान केंद्रांवरील व्यवस्था, सुरक्षा आणि आवश्यक सुविधांची तयारी करण्यात आली आहे.

दरम्यान, मतदान केंद्र परिसरात प्रतिबंधात्मक आदेश लागू करण्यात आले आहेत. मतदान केंद्राच्या परिसरात केवळ उमेदवार, मतदार तसेच निवडणूक कामकाजासाठी नियुक्त अधिकारी आणि कर्मचाऱ्यांनाच प्रवेश दिला जाणार आहे. ओळखपत्राशिवाय कोणालाही मतदान केंद्रात प्रवेश मिळणार नाही. तसेच सर्व मतदान केंद्रांवर सीसीटीव्ही कॅमेऱ्यांच्या माध्यमातून निगराणी ठेवण्यात येणार आहे.

जिल्ह्यातील 11 तालुक्यांमध्ये मतदारांची संख्या वेगवेगळी असून, सातारा तालुक्यात सर्वाधिक 473 मतदार आहेत. त्याखालोखाल कराड तालुक्यात 336, फलटणमध्ये 263, तर पाटणमध्ये 199 मतदार आहेत. महाबळेश्वर तालुक्यात सर्वांत कमी 51 मतदार मतदानाचा हक्क बजावणार आहेत.

जिल्हा बँकेच्या या निवडणुकीकडे सहकार क्षेत्राचे लक्ष लागले असून, रविवारी होणाऱ्या मतदानासाठी प्रशासनाने कडेकोट तयारी केली आहे.

तालुकानिहाय मतदार संख्या

तालुका | मतदार 

सातारा | 473 

जावली | 69 

महाबळेश्वर | 51 

कराड | 336 

पाटण | 199 

कोरेगाव | 127 

खटाव | 150 

माण | 123 

खंडाळा | 88 

वाई | 142 

फलटण | 263 

एकूण | 2,021