सातारा : सातारा शहरातील वाहतूक कोंडी कमी करण्यासाठी समर्थ मंदिर ते बोगदा या मार्गावरील अतिक्रमण हटाव आणि रस्ता रुंदीकरण मोहिमेला नगरपालिका प्रशासनाने गती दिली आहे. गेल्या दोन दिवसांपासून या परिसरात जेसीबीच्या सहाय्याने अतिक्रमणांवर कारवाई सुरू असून काही नागरिकांनी स्वतःहून बांधकामे हटवण्यास सुरुवात केल्याचे चित्र पाहायला मिळत आहे.

नगरपालिकेने रस्त्याच्या मध्यापासून दोन्ही बाजूंना साडेसात मीटरपर्यंतची जागा मोकळी करण्याचा निर्णय घेतला आहे. त्यानुसार पत्र्यांच्या शेड्स, संरक्षक भिंती, पक्की बांधकामे आणि इतर अडथळे हटवले जात आहेत. या मार्गावरील सुमारे ४५ अतिक्रमणधारकांना यापूर्वी नोटिसा देण्यात आल्या होत्या.

अतिक्रमण निरीक्षक प्रशांत निकम यांच्या नेतृत्वाखाली दहा कर्मचाऱ्यांचे पथक, दोन जेसीबी आणि दोन डंपरच्या सहाय्याने कारवाई सुरू आहे. पाटील हॉस्पिटलसमोरील नगरपालिकेच्या जागेवरील जुन्या बांधकामाचा काही भागही हटवण्यात आला. प्रशासनाच्या माहितीनुसार, या कारवाईमुळे रस्ता मोठ्या प्रमाणात मोकळा झाला आहे.

मुख्याधिकारी विनोद जळक यांनी नगरपालिकेच्या मालकीच्या जागांवरील अतिक्रमणे हटवण्याची मोहीम सुरू असल्याचे सांगितले. खाजगी मालमत्तेवर परिणाम झाल्यास नियमानुसार मोजणी करून पुढील निर्णय घेतला जाईल, असे त्यांनी स्पष्ट केले.

नगराध्यक्ष अमोल मोहिते यांनी शहरातील वाहतूक सुरळीत करण्यासाठी अशा मोहिमा पुढेही सुरू राहतील, असे सांगितले.