सातारा : सातारा शहरातील क्रिकेटप्रेमींसाठी पर्वणी ठरलेल्या ‘सातारा डिस्ट्रिक्ट प्रीमियर लीग’ अंतर्गत आयोजित ‘मंत्री शिवेंद्रसिंहराजे भोसले चषक’ नाईट ओव्हरआर्म टेनिस बॉल क्रिकेट स्पर्धेला गुरुवारी छत्रपती शाहू क्रीडा संकुल येथे उत्साहात प्रारंभ झाला. मंत्री शिवेंद्रसिंहराजे भोसले यांच्या हस्ते नाणेफेक करून स्पर्धेचे उद्घाटन करण्यात आले.

प्रकाशझोतात रंगलेल्या या स्पर्धेला शहरातील युवक, क्रिकेटप्रेमी आणि क्रीडारसिकांनी मोठी उपस्थिती लावली होती. उद्घाटन सोहळ्यात नगराध्यक्ष अमोल मोहिते, उपनगराध्यक्ष दत्तात्रय बनकर, पत्रकार विनोद कुलकर्णी, नगरसेवक अविनाश कदम, बाळासाहेब खंदारे, धनंजय जांभळे, अक्षय जाधव, फिरोज पठाण, जयवंत भोसले, राजू गोरे, विजय बडेकर, निशांत पाटील, दिलीप म्हेत्रे तसेच पंचायत समिती सभापती महेश गाडे यांच्यासह अनेक मान्यवर उपस्थित होते.

यावेळी बोलताना मंत्री शिवेंद्रसिंहराजे भोसले यांनी क्रीडा क्षेत्र युवकांच्या व्यक्तिमत्त्व विकासासाठी महत्त्वाचे माध्यम असल्याचे सांगितले. ग्रामीण आणि शहरी भागातील अनेक गुणवंत खेळाडूंना अशा स्पर्धांमुळे मोठे व्यासपीठ मिळते. खेळामुळे युवकांमध्ये संघभावना, शिस्त आणि नेतृत्वगुण विकसित होतात, असे त्यांनी नमूद केले.

स्पर्धेचे आयोजन अविनाश कदम मित्र समूह आणि महाराष्ट्र स्टेट वेटेरेन्स स्पोर्ट्स असोसिएशन फॉर ऑल स्पोर्ट्स यांच्या वतीने करण्यात आले आहे. उपस्थित मान्यवरांनी आयोजकांच्या नियोजनाचे कौतुक करत स्पर्धा यशस्वी होण्यासाठी शुभेच्छा दिल्या.

रात्रभर रंगणारे सामने, उत्साही प्रेक्षकांचा जल्लोष आणि आकर्षक वातावरणामुळे सातारा शहरात क्रिकेटचा उत्सवच रंगला असल्याचे चित्र पाहायला मिळाले.