सातारा : धर्मासाठी आहुती देणाऱ्या धर्मवीर संभाजीराजे यांच्या बलिदान दिनानिमित्त सातारा शहरात शिवप्रतिष्ठान हिंदुस्थान यांचे वतीने विविध कार्यक्रमांचे आयोजन करण्यात आले होते. या कार्यक्रमात सकाळी छत्रपती संभाजीराजे यांना अभिवादन आणि सायंकाळी बलिदान दिनानिमित्त गोलबाग राजवाडा ते पोवई नाका अशी मूक पदयात्रा काढण्यात आली होती.

छत्रपती शिवाजी महाराज यांनी स्थापन केलेल्या हिंदवी स्वराज्याच्या उभारणी मध्ये छत्रपती संभाजीराजे यांनी धर्म रक्षक संभाजी म्हणून मोठे योगदान दिले आणि धर्म रक्षणासाठी आपल्या प्राणाचे बलिदान दिले. फाल्गुन अमावस्या हा दिवस इतिहासामध्ये छत्रपती संभाजी महाराज यांचा बलिदान दिन म्हणून साजरा केला जातो. सातारा शहरामध्ये शिवप्रतिष्ठान हिंदुस्थान यांच्या वतीने या दिवसाच्या आधी 15 दिवस बलिदान मास या नावाने तो दिवस ओळखला जातो. प्रतिष्ठानच्यावतीने साताऱ्यात सकाळी 9 वाजता उपनगराध्यक्ष अॅड. दत्ता बनकर, सातारा पंचायत समितीचे सभापती महेश गाडे यांच्या उपस्थितीत छत्रपती संभाजी महाराजांच्या प्रतिमेला अभिषेक करून अभिवादन करण्यात आले. तसेच श्रीक्षेत्र वढू तुळापूर तालुका शिरूर जिल्हा पुणे येथून आणलेल्या धर्मवीर ज्योतीचे साताऱ्यात उत्स्फूर्त स्वागत करण्यात आले. शिवप्रतिष्ठान हिंदुस्थानच्या कार्यकर्त्यांनी या ज्योतीचे पोवई नाका शिवतीर्थ येथे स्वागत करून या ज्योतीला अभिवादन केले. सातारा पालिके समोरील नाना नानी पार्क मध्ये छत्रपती संभाजी महाराज यांचे तैलचित्र उभारण्यात आले आहे. या प्रतिमेला नगराध्यक्ष अमोल मोहिते, उपनगराध्यक्ष अॅड. दत्ता बनकर, नियोजन सभापती अशोक शेडगे, नगरसेविका हेमलता भोसले, नगरसेविका अनिता फरांदे, नगरसेवक सुशांत महाजन यांच्या उपस्थितीत पुष्प चक्र अर्पण करून अभिवादन करण्यात आले. सायंकाळी राजवाडा गोलबाग ते पोवई नाका छत्रपती संभाजी महाराज यांच्या बलिदान दिनानिमित्त मूक पदयात्रेचे आयोजन करण्यात आले होते. या पदयात्रेमध्ये सुमारे 500 हून अधिक कार्यकर्ते सहभागी झाले होते. विविध कार्यक्रमांच्या माध्यमातून छत्रपती संभाजी महाराज यांना अभिवादन करून या बलिदान दिनाचे स्मरण करण्यात आले.