सातारा : जागतिक स्तरावर वाढत चाललेल्या युद्धाच्या परिस्थितीबाबत अमेरिकेचे माजी राष्ट्राध्यक्ष डोनाल्ड ट्रम्प यांच्या धोरणांचा निषेध करत तसेच महाराष्ट्राचे समाजकल्याण मंत्री संजय शिरसाट यांनी अॅट्रॉसिटी कायद्याबाबत केलेल्या वक्तव्याच्या विरोधात (रिपाई)च्या वतीने जिल्हाधिकाऱ्यांना निवेदन देण्यात आले. तसेच विविध प्रश्नांवर सोमवारी जिल्हाधिकारी कार्यालयासमोर आंदोलन करण्याचा इशाराही देण्यात आला आहे.

रिपब्लिकन पार्टी ऑफ इंडियाच्या वतीने आयोजित पत्रकार परिषदेत जिल्हाध्यक्ष व प्रदेश महासचिव दादासाहेब ओव्हाळ यांनी ही माहिती दिली. त्यांनी सांगितले की, सध्या जगातील परिस्थिती दिवसेंदिवस तणावपूर्ण होत असून इराण-इस्रायल संघर्षामुळे संपूर्ण जग तिसऱ्या महायुद्धाच्या दिशेने ढकलले जात असल्याची भीती व्यक्त होत आहे. अशा परिस्थितीत अमेरिकेच्या धोरणांमुळे जागतिक स्तरावर आर्थिक मंदी व आर्थिक विषमता वाढण्याचा धोका निर्माण होत असल्याचा आरोपही त्यांनी केला.

या पार्श्वभूमीवर रिपब्लिकन पार्टी ऑफ इंडियाच्या वतीने जिल्हाधिकारी कार्यालयासमोर लक्षवेधी आंदोलन करण्यात येणार आहे. या आंदोलनाद्वारे संभाव्य गॅस टंचाई, डिझेल-पेट्रोलची कमतरता तसेच इंटरनेट सेवांमध्ये येणाऱ्या अडचणींमुळे नागरिकांना होणारी गैरसोय कमी करण्यासाठी प्रशासनाने योग्य उपाययोजना कराव्यात, अशी मागणी करण्यात येणार आहे.

आंदोलनादरम्यान अमेरिकेचे माजी राष्ट्राध्यक्ष डोनाल्ड ट्रम्प यांच्या धोरणांचा निषेध व्यक्त करण्यासाठी आगळ्यावेगळ्या पद्धतीने निषेध नोंदविण्यात येणार असून प्रतीकात्मक स्वरूपात चुलीवर मिरचीची धुरी देऊन आंदोलन करण्यात येणार असल्याचेही ओव्हाळ यांनी सांगितले.याचबरोबर समाजकल्याण मंत्री संजय शिरसाठ यांनी अॅट्रॉसिटी कायद्याबाबत केलेले वक्तव्य मागे घ्यावे, अशी मागणीही रिपाईने केली आहे. समाजकल्याण खात्यातील निधी इतर योजनांकडे वळवण्यात आल्याचा आरोप करत या प्रकरणातही तीव्र नाराजी व्यक्त करण्यात आली.

या वेळी रिपब्लिकन पार्टी ऑफ इंडिया युवक आघाडीचे अध्यक्ष सोमनाथ धोत्रे, महिला आघाडीच्या अध्यक्षा दामिनी निंबाळकर, कामगार युनियन जिल्हाध्यक्ष मदन खकाळ, वाहतूक आघाडी जिल्हाध्यक्ष राजेश ओव्हाळ, मुस्लिम आघाडीचे जिल्हाध्यक्ष शाहिद कुरेशी, सलीम शेख, तसेच जय आव्हाळ, योगा मामा, दिपक कानर्मा आदी कार्यकर्ते उपस्थित होते.