सातारा : सातारा पालिकेचे परिवहन विभागाचे अधिकारी प्रशांत निकम यांच्या पाणी न देण्याच्या आडमुठ्या धोरणाचा गोडोली ग्रामस्थांनी शुक्रवारी निषेध केला. येथील समाज मंदिर परिसरात गोडोली ग्रामस्थांनी निषेध सभा बोलवत घडल्या प्रकाराची नाराजी व्यक्त केली. आम्ही सुद्धा पालिकेचे करदेयक आहोत. त्यामुळे आम्हाला सुविधा मिळाल्याच पाहिजेत, अशी मागणी करत गोडोली ग्रामस्थांनी पाणी आमच्या हक्काचं नाही कोणाच्या बापाचं, अशा घोषणा दिल्या. या आंदोलनाचे नेतृत्व माजी नगरसेवक शेखर मोरे पाटील यांनी केले.

गोडोली गावठाणामध्ये प्रचंड पाणीटंचाई असल्यामुळे व परिसरात दोन विवाह समारंभ असल्यामुळे मोरे पाटील यांनी पालिकेकडे टँकरची नोंद करून पाण्याची मागणी केली होती. मात्र पाणी उपलब्ध न झाल्यावरून पालिका अधिकारी प्रशांत निकम व शेखर मोरे यांच्यामध्ये शाब्दिक चकमक झाली. या प्रकरणाचा पालिका कर्मचार्‍यांनी पालिकेचे कामकाज बंद ठेवून निषेध केला. शनिवारी गोडोली ग्रामस्थांनी चक्क पाणी न देणार्‍या त्या अधिकार्‍याच्या निषेधार्थ निषेध सभा बोलावली आणि या प्रकरणाचा सर्व ग्रामस्थांनी निषेध केला.

सातारा पालिका काही विशिष्ट लोकांसाठी चालवली जात आहे. तेथे सर्वसामान्य लोकांना न्याय मिळत नाही, असा आरोप शेखर मोरे पाटील यांनी करत संबंधित अधिकार्‍याची तात्काळ बदली मुख्याधिकार्‍यांनी करावी, अशी मागणी केली. आम्ही सुद्धा या भागातील करदाते आहोत. आम्हाला सुद्धा पायाभूत सुविधा मिळाल्याच पाहिजेत, अशी आग्रही भूमिका मोरे पाटील यांनी मांडली. यावेळी पाणी आमच्या हक्काचं नाही कुणाच्या बापाचं, अशा घोषणा गोडोली ग्रामस्थांनी दिल्या. निकम यांनी आणीबाणीच्या काळामध्ये एक गाडी स्टॅन्ड बाय ठेवावी लागते, असे कारण सांगत सरकारी नियम सांगितला. मात्र याच मुद्द्यावर बोट ठेवून गोडोली ग्रामस्थांनी पाणी न मिळाल्याचा निषेध करत पालिका प्रशासनाला लक्ष्य केले आहे. याबाबत मुख्याधिकारी अभिजीत बापट काय भूमिका घेतात, याकडे सर्वांचे लक्ष लागले आहे.