सातारा : शिवानंद स्वामी संगीत प्रतिष्ठानच्या वतीने गेली 85 वर्षे सुरू असलेल्या औंध संगीत महोत्सव 2025 चे उद्घाटन शनिवार दिनांक 11 ऑक्टोबर रोजी सकाळी पावणे नऊ वाजता औंधच्या राणी गायत्री देवी पंतप्रतिनिधी यांच्या हस्ते होणार आहे. याची माहिती ट्रस्टच्या विश्वस्त अपूर्वा गोखले आणि पल्लवी जोशी यांनी सातारा येथील पत्रकार परिषदेत दिली.

माहिती देताना त्या म्हणाल्या, दिनांक अकरा रोजी सायंकाळी चार वाजता रियाज 2025 या स्मरणिकेचे प्रकाशन राज्याचे उपमुख्यमंत्री अजित दादा पवार यांच्या प्रमुख उपस्थितीत आणि महाराष्ट्र मेट्रो रेल कार्पोरेशनचे मॅनेजिंग डायरेक्टर श्रावण हर्डीकर यांच्या उपस्थितीत होणार आहे. यावेळी ग्रामविकास विभागाचे प्रशासक आय. ए. शेख, साताऱ्याचे जिल्हाधिकारी संतोष पाटील आणि औंध ग्रामपंचायत ग्रामविकास अधिकारी सी.एम. काजी हे उपस्थित राहणार आहेत.

महोत्सवाच्या सकाळी पहिल्या सत्रामध्ये अपूर्वा गोखले-पल्लवी जोशी यांचे सह गायन, अभिषेक बोरकर यांचे सरोद वादन, राजेंद्र अंतरकर यांचे तबला वादन, अमिता गोखले यांचे गायन होणार आहे . दुपारच्या अडीचच्या सत्रात प्राजक्ता मराठे यांचे गायन आणि रियाझ स्मरणिकेचा प्रकाशन सोहळा होणार आहे. त्यानंतर एकल संवादिनी वादन सुधीर नायक करणार असून पंडित अरुण कशाळकर हे गाण सेवा प्रस्तुत करणार आहेत. यानंतर अनन्या गोवित्रीकर यांचे कथक नृत्य सादर केले जाणार आहे.

रात्री दहाच्या सत्रामध्ये पंडित उल्हास कशाळकर यांचे गायन, तबलावादक सुरेश तळवळकर आणि सुधीर नायक यांची संवादिनीवर साथ आहे. सायंकाळी पार्थ भूमकर आणि रोहित खवले यांची पखवाज जुगलबंदी, तर जयतीर्थ मेथुंडी यांचे गायन होणार आहे.

हा कार्यक्रम मोफत असून त्या कार्यक्रमास बहुसंख्येने उपस्थित राहण्याचे आवाहन जोशी, गोखले यांनी केले आहे.