वर्ये : आजच्या डिजिटल युगात सायबर सिक्युरिटी व कृत्रिम बुद्धिमत्ता (Artificial Intelligence) हे क्षेत्र सर्वाधिक वेगाने विकसित होत असून, विद्यार्थ्यांनी या तंत्रज्ञानाचा अभ्यास करून स्वतःचा विकास साधावा, यासाठी रयत शिक्षण संस्थेच्या वर्ये, तालुका सातारा येथील शाखेमध्ये विशेष कार्यशाळेचे आयोजन करण्यात आले.

या कार्यशाळेत तज्ज्ञ मार्गदर्शकांनी सायबर हल्ल्यांपासून संरक्षण, पासवर्ड व्यवस्थापन, सुरक्षित इंटरनेट वापर, डेटा प्रायव्हसी, तसेच ए.आय. तंत्रज्ञानाचे शिक्षण, उद्योग, वैद्यकीय व सामाजिक क्षेत्रातील उपयोग यावर सखोल माहिती दिली. विद्यार्थ्यांना थेट प्रात्यक्षिकांद्वारे संगणकीय हॅकिंगपासून बचावाचे तंत्र समजावून सांगितले गेले. कृत्रिम बुद्धिमत्तेच्या साहाय्याने रोजगाराच्या नव्या संधी, करिअरची दिशा आणि संशोधन क्षेत्रातील संधी यांबद्दलही विद्यार्थ्यांना मार्गदर्शन करण्यात आले.

या कार्यक्रमासाठी सातारा जिल्हा पत्रकार संघाचे कार्याध्यक्ष ज्ञानेश्वर भोईटे, सातारा तालुका पत्रकार संघाचे अध्यक्ष अजय कदम व उपाध्यक्ष विजय जाधव प्रमुख पाहुणे म्हणून उपस्थित होते. त्यांनी विद्यार्थ्यांशी संवाद साधताना “आजच्या काळात सायबर सुरक्षेबाबत प्रत्येकाने सजग राहण्याची गरज आहे. तसेच ए.आय. तंत्रज्ञानाचे योग्य आकलन करून विद्यार्थ्यांनी नव्या युगात आपले स्थान निर्माण करावे” असे प्रतिपादन केले.

रयत शिक्षण संस्थेच्या पदाधिकाऱ्यांच्या मार्गदर्शनाखाली आणि प्राध्यापकांच्या सक्रिय सहभागामुळे हा उपक्रम अत्यंत यशस्वी ठरला. विद्यार्थ्यांनी कार्यशाळेत उत्स्फूर्त सहभाग नोंदवून आधुनिक तंत्रज्ञान आत्मसात करण्याची इच्छा व्यक्त केली.

संस्थेच्या वतीने प्रमुख पाहुण्यांचा सत्कार करण्यात आला.