मुंबई : कॉमजगप्रसिद्ध तबलावादक झाकीर हुसैन यांनी कायमचे 'अलविदा' करत जगाचा निरोप घेतला. तब्बल सहा दशकांहून अधिक काळ तबल्याचा ताल जगाला ऐकवून भुरळ घालणारे झाकीर हुसेन आता राहिले नाहीत. झाकीर हुसैन यांचे रविवारी रात्री सॅन फ्रान्सिस्को येथील रुग्णालयात निधन झाले, ते 73 वर्षांचे होते. झाकीर यांना त्यांच्या तबलावादनासाठी पद्मश्री, पद्मभूषण, पद्मविभूषण आणि ग्रॅमी पुरस्काराने सन्मानित करण्यात आले आहे. 

विविध मानाचे पुरस्कार

उस्ताद झाकीर हुसैन यांनी संपूर्ण जगाला भारतीय तालवाद्य तबल्याची ओळख करून दिली. तबलावादक म्हणून त्यांनी जगभर नाव कमावले होते. त्यांना त्यांच्या संगीत कारकिर्दीत 4 ग्रॅमी पुरस्कार मिळाले आहेत, त्यापैकी तीन या वर्षाच्या सुरुवातीला ६६ व्या ग्रॅमी पुरस्कारांमध्ये मिळाले होते. झाकीर हुसैन, भारतातील सर्वात प्रसिद्ध शास्त्रीय संगीतकारांपैकी एक होते. त्यांना १९८८ मध्ये पद्मश्री, २००२ मध्ये पद्मभूषण आणि २०२३ मध्ये पद्मविभूषण अशा सर्वोच्च पुरस्कारांनी सन्मानित करण्यात आले.

उत्कृष्ट कामगिरीचा सन्मान

संगीत उद्योगातील उत्कृष्ट कामगिरीचा सन्मान करण्यासाठी कलाकारांना ग्रॅमी पुरस्कार दिला जातो. हा पुरस्कार रेकॉर्डिंग अकादमी, युनायटेड स्टेट्समधील रेकॉर्डिंग कलाकार, संगीतकार, निर्माते आणि अभियंते यांच्या व्यावसायिक संस्थेद्वारे प्रदान केला जातो. जगभरातील संगीतकार आणि संगीतप्रेमी, ग्रॅमी पुरस्कारांमध्ये उत्साहाने सहभागी होतात. संगीत क्षेत्रातील हा सर्वात मोठा आणि प्रतिष्ठीत असा पुरस्कार मानला जातो. ग्रॅमी अवॉर्ड्स ही लॅटिन ॲकॅडमी ऑफ रेकॉर्डिंग आर्ट्स अँड सायन्सेस द्वारे युनायटेड स्टेट्समध्ये दरवर्षी सादर केल्या जाणाऱ्या पुरस्कारांची मालिका आहे. या संस्थेचे मताधिकार असलेले सदस्य प्रत्येक पुरस्कारासाठी पाच नामांकित व्यक्तींची निवड करतात.

मृत्युचे कारण

मिळालेल्या माहितीनुसार, झाकीर हुसैन यांना रक्तदाबाचा त्रास होता. गेल्या दोन आठवड्यांपासून हृदयविकारामुळे त्यांना सॅन फ्रान्सिस्को येथील रुग्णालयात दाखल करण्यात आले होते. त्याच्या कुटुंबीयांच्या म्हणण्यानुसार, हुसैन यांचा मृत्यू इडिओपॅथिक पल्मोनरी फायब्रोसिसमुळे झाला. गेल्या दोन आठवड्यांपासून ते रुग्णालयात दाखल होते आणि याच काळात त्यांची प्रकृती खालावल्याने त्यांना आयसीयूमध्ये दाखल करण्यात आले. मात्र डॉक्टरांना त्यांना वाचविण्यात यश आले नाही. हुसैन यांची पत्नी कथ्थक नृत्यांगना आणि शिक्षिका, अँटोनिया मिनेकोला असून त्यांना अनीसा कुरेशी आणि इसाबेला कुरेशी या दोन मुली आहेत.