सातारा : 'मी फरारी आहे. मला खर्चाला ५० हजार रुपये दे,' असे म्‍हणत कुख्यात गुन्‍हेगार लल्‍लन जाधव याने त्‍याच्या 7 साथीदारांसोबत प्रतापसिंहनगरात राडा घातला. बंदूकीसारखे शस्‍त्र डोक्‍याला लावत एकाला मारहाण करुन लुटमार केल्‍याचा गुन्‍हा सातारा शहर पोलिस ठाण्यात दाखल झाला आहे.

लल्‍लन जाधव, निखिल काळे, वाढीव (पूर्ण नाव माहित नाही) यांच्यासह ८ जणांविरुध्द रणजित नवनाथ कसबे (वय ३०, सर्व रा.प्रतापसिंहनगर, सातारा) यांनी पोलिस ठाण्यात तक्रार दिली आहे.

याबाबत पोलिसांनी दिलेली माहिती अशी, ही घटना दि. ८ नोव्‍हेबर रोजी प्रतापसिंहनगर मध्ये घडली आहे. तक्रारदार हे चौकात थांबले असताना संशयित टोळी तेथे आली. लल्‍लन जाधव याने तक्रारदार यांना ५० हजार रुपये मागितले. यावर तक्रारदार यांनी पैसे नसल्‍याचे सांगताच संशयितांनी तक्रारदार यांना मारहाण करण्यास सुरुवात केली. डोक्‍याला पिस्‍तूल सारखे हत्‍यार लावून तक्रारदार यांच्या गळ्यातील सोन्‍याची चेन जबरदस्‍तीने हिसकावून घेतली. हातांनी, लाथा बुक्‍क्‍यांनी मारहाण करत तक्रारदार यांच्या खिशातील ३० हजार रुपये काढून घेतले. यावेळी टाेळक्‍यातील एकाने धारदार चाकूने तक्रारदार यांच्यावर हल्‍ला केला. यामध्ये ते जखमी झाले. हल्‍ल्‍यानंतर संशयित तेथून पसार झाले.

या घटनेमुळे परिसरात काही काळ तणावाचे वातावरण निर्माण झाले. पोलिसांना या घटनेची माहिती समजल्‍यानंतर त्‍यांनी घटनास्‍थळी धाव घेतली. तक्रारदार यांनी तक्रार दिल्‍यानंतर पोलिसांनी त्‍यानुसार गुन्‍हा दाखल केला.