मुंबई : बॉलिवूडमध्ये काम करावं आणि कलाकार म्हणून प्रसिद्ध व्हावं, अशी अनेकांची इच्छा असते. पण काही कलाकार असेही असतात जे प्रसिद्धी मिळूनही बॉलिवूड सोडण्याचा निर्णय घेतात. अभिनेत्री मयुरी कांगोच्या बाबतीतही असंच काहीसं झालं. 

बॉलिवूडला ठोकला रामराम

नव्वदच्या दशकात बॉलिवूडमध्ये पैसा आणि प्रसिद्धी दोन्हीही मिळत असताना मयुरी कांगोने एक अनपेक्षित निर्णय घेतला. तिने बॉलिवूड सोडून गुगलमध्ये नोकरी करण्याचा निर्णय घेतला. 

'पापा कहते है' फेम अभिनेत्री मयुरी कांगो

'पापा कहते है' या चित्रपटामुळे मयुरी प्रसिद्ध झाली. त्यासोबतच तिने 'नर्गिस', 'थोडा गम थोडी खुशी', 'डॉलर बहू', 'किटी पार्टी' अशा टीव्ही शोमध्येही काम केलं. चित्रपट आणि टीव्ही शोमुळे मयुरी लोकप्रिय झाली. पण तिने 2003 मध्ये अचानक बॉलिवूड सोडण्याचा निर्णय घेतल्याने अनेकांना धक्का बसला.

एमबीएचं शिक्षण

मयुरी आणि तिचा नवरा अमेरिकेत राहायला गेले. तिने तिथे वेगळ्या क्षेत्रात वाटचाल सुरु केली. तिने Zicklin School of Business मधून मार्केटिंग आणि फायनान्समध्ये एमबीए केलं. त्यानंतर तिच्या आयुष्यातला नवा अध्याय सुरु झाला. 

बॉलिवूडसाठी सोडलेला आयआयटीचा मार्ग

बॉलिवूडमध्ये येण्याआधी मयुरीने IIT Entrance परीक्षेत उत्तम गुण मिळवून आयआयटी कानपूरमध्ये प्रवेश मिळवला. पण अभिनय क्षेत्रातील आवडीमुळे तिने आयआयटीमध्ये शिक्षण न घेता बॉलिवूडमध्ये जाण्याचा निर्णय घेतला. 

एमबीए करुन गुगलमध्ये मिळवली नोकरी

पुढे मग 2004 ते 2012 या काळात तिने पुन्हा आपल्या शिक्षणाकडे लक्ष देण्याचा निर्णय घेतला. एमबीए केल्यानंतर ती 2013 मध्ये भारतात परत आली. तिला Performix मध्ये मॅनेजिंग डायरेक्टरची नोकरी मिळाली. त्यानंतर 2019 मध्ये तिने गुगलमध्ये काम करण्याचा निर्णय घेतला. मयुरी गुगल इंडियाची इंडस्ट्री हेड बनली. 

काही वर्षांमध्येच मयुरीचं काम पाहून तिला हेड ऑफ इंडस्ट्री - एजन्सी पार्टनरशिप असं पद देण्यात आलं. गुगलचे इतर एजन्सी आणि क्लायंटसोबतचं नातं अधिक चांगलं व्हावं, यासाठी तिने खूप मेहनत घेतली. बॉलिवूडमधून बाहेर पडून तंत्रज्ञानाच्या जगात तिने यश प्राप्त केलं.

मयुरी कांगोचा प्रेरणादायी प्रवास

तुमच्याकडे टॅलेंट असेल आणि तुमची मेहनत करण्याची तयारी असेल तर तुम्ही कोणत्याही क्षेत्रामध्ये यश प्राप्त करु शकता, हे मयुरीने सिद्ध केलं आहे. तिची कारकिर्द अनेकांसाठी प्रेरणादायी आहे.