सातारा : सातारा जिल्ह्यातील लाचलुचपत प्रतिबंधक विभागात महत्त्वाचा प्रशासकीय बदल करण्यात आला असून उपअधीक्षकपदाची जबाबदारी आता शैला शंकर कोरडे यांच्याकडे सोपविण्यात आली आहे. त्यांच्या नियुक्तीमुळे जिल्ह्यातील भ्रष्टाचारविरोधी मोहिमेला नवे बळ मिळण्याची शक्यता वर्तवली जात आहे.

याआधी सातारा एसीबीचे नेतृत्व सांभाळणारे राजेश वाघमारे यांची छत्रपती संभाजीनगर येथे एसीबी युनिट प्रमुख म्हणून नियुक्ती करण्यात आली आहे. साताऱ्यातील कार्यकाळात त्यांनी अनेक संवेदनशील लाचखोरी प्रकरणांवर कारवाई करत एसीबीची सक्रिय प्रतिमा निर्माण केली होती. विविध विभागांतील अधिकाऱ्यांविरोधातील कारवायांमुळे त्यांच्या कामाची विशेष दखल घेतली गेली होती.

नवनियुक्त उपअधीक्षक शैला कोरडे या तपास आणि प्रशासकीय कामकाजाचा अनुभव असलेल्या अधिकारी म्हणून ओळखल्या जातात. त्यामुळे सातारा जिल्ह्यातील भ्रष्टाचारविरोधी यंत्रणा अधिक सक्षमपणे कार्यरत होईल, अशी अपेक्षा व्यक्त होत आहे.

दरम्यान, वाघमारे यांच्या बदलीनंतर एसीबी कार्यालयात त्यांचा निरोप समारंभ पार पडला. अधिकारी व कर्मचाऱ्यांनी त्यांना पुढील नियुक्तीसाठी शुभेच्छा दिल्या.