सातारा : शाहूनगर येथे गणेश हाउसिंग सोसायटीत घरफोडी करून १ लाख २७ हजाराचा मुद्देमाल चोरून नेणाऱ्या चैतन्य विशाल माने (वय १९ रा. १५० ब, रविवार पेठ) याला अटक करण्यात आली आहे. दिनांक १९ डिसेंबर रोजी ही चोरीची घटना घडली. सातारा शहर पोलीस स्टेशनच्या गुन्हे प्रकटीकरण शाखेने रविवार पेठ परिसरातून संशयिताला अटक करून त्याच्याकडील मुद्देमाल जप्त केला आहे. अधिक चौकशीसाठी त्याला न्यायालयासमोर हजर केले असता तीन दिवसाची पोलीस कोठडी सुनावली आहे.

सातारा शहर परिसरातील वाढत्या घरफोडीच्या गुन्ह्यांना प्रतिबंध करण्यासाठी रात्रगस्त वाढवण्यात आली आहे. गुन्हे प्रकटीकरण शाखेचे पोलीस निरीक्षक सचिन मेत्रे यांच्या मार्गदर्शनाखालील पथकाने रविवार पेठ परिसरातून विशाल माने याला अटक केली. त्याच्याकडून सोन्याचे दागिने, पितळेची भांडी, चिल्लरचा डबा ताब्यात घेण्यात आला आहे.

अंनिसचे तारांगण ऑफिस फोडले

शाहूनगर येथील अंधश्रद्धा निर्मूलन समितीचे तारांगण ऑफिस चोरट्याने फोडले होते. येथील बंद कपाटाचे दरवाजेही त्याने तोडले. मात्र तेथे काही आढळून आले नाही. सातारा पोलिसांनी आरोपीला न्यायालयात हजर केले असता त्याला तीन दिवसाची पोलीस कोठडी देण्यात आली आहे. पोलीस अधिक्षक समीर शेख अतिरिक्त पोलीस अधीक्षक डॉ. वैशाली कडूकर यांनी या कारवाईचे अभिनंदन केले.

कारवाईची भीती दाखवून २३ लाखांची फसवणूक

दरम्यान गेल्या काही दिवसाखाली काळ्या पैसे व्यवहारात कारवाईची भीती दाखवून सायबर चोरट्यांनी तरुणाला २३ लाख रुपयांना गंडा घातला. याप्रकरणी सायबर चोरट्यांवर विमानतळ पोलिसांत तक्रार दाखल केली आहे. तक्रारदार तरुण लोहगाव भागात राहायला आहे. सायबर चोरट्यांनी त्याला मोबाइलद्वारे संपर्क केला. काळ्या पैसे व्यवहारात मुंबई गुन्हे शाखेकडून गुन्हा दाखल करण्यात येणार आहे. त्यात तुमचे नाव असून, अटक टाळण्यासाठी तातडीने पैसे भरावे लागतील, अशी भीती दाखवून चोरट्यांनी तरुणाला तातडीने पैसे भरण्यास सांगितले. ऑनलाइन पद्धतीने तरुणाने चोरट्यांच्या खात्यात वेळोवेळी पैसे जमा केले. तरुणाची २३ लाख रुपयांची फसवणूक केली. फसवणूक झाल्याचे लक्षात आल्यानंतर तरुणाने पोलिसांकडे धाव घेतली.

दरम्यान गेल्या काही दिवसाखाली कराड तालुक्यातील सात जणांना शेअर मार्केटमधील गुंतवणुकीतून दुप्पट परतावा देण्याचे आमिष दाखवून त्यांची ७० लाख ५० हजार रुपयांची फसवणूक करण्यात आली आहे. याबाबत अल्लाउद्दीन गुलाब तांबोळी (रा. गांधीनगर-काले, ता. कराड) यांनी कराड शहर पोलीस ठाण्यात फिर्याद दिली आहे. त्यावरून प्रमोद रमेश पाटील (रा. पंचरत्न अपार्टमेंट, आगाशिवनगर-मलकापूर, कराड) याच्यावर कराड शहर पोलिसात गुन्हा दाखल झाला आहे.