सातारा : एकास जिवे मारण्याचा प्रयत्न केल्याप्रकरणी आरोपीस कराड सत्र न्यायालयाने सात वर्षे सक्तमजुरी आणि पाच हजार रुपये दंड, व दंड न भरल्यास एक महिन्याची कैद अशी शिक्षा सुनावली आहे.

भीमराव सिताराम देवकांत वय 64, राहणार टोळेवाडी, तालुका पाटण, जिल्हा सातारा असे शिक्षा झालेल्या आरोपीचे नाव आहे.

याबाबत पोलिसांनी दिलेली माहिती अशी, दि. 7 जानेवारी 2019 रोजी सायंकाळी सहा वाजण्याच्या सुमारास पाटण, तालुका पाटण गावच्या हद्दीत लायब्ररी चौकामध्ये भीमराव देवकांत याने जुन्या भांडणाचा राग मनात धरून नारायण गणपती डिगे राहणार टोळेवाडी, तालुका पाटण, जिल्हा सातारा याच्यावर जीवे मारण्याच्या उद्देशाने कोयत्याने वार करून डिगे यास गंभीर जखमी केले होते. याबाबत पाटण पोलीस ठाण्यात देवकांत यांच्या विरोधात गुन्हा नोंद करण्यात आला होता.

या गुन्ह्याचा तपास पाटण पोलीस ठाण्याचे सहाय्यक पोलीस निरीक्षक यु. एस. भापकर यांनी करून न्यायालयात आरोपी विरोधात दोषारोप पत्र दाखल केले. या खटल्यात अतिरिक्त सरकारी अभियोक्ता श्रीमती पी. जे. जाधव यांनी काम पाहिले. त्यांनी नऊ साक्षीदार तपासले आणि खटल्यातील शिक्षेवर जोरदार युक्तिवाद केला. तसेच अनेक दाखलेही न्यायालयासमोर मांडले. प्रत्यक्षदर्शी साक्षीदार, पंच व तपासी अंमलदार यांच्या साक्षी महत्त्वाच्या धरून न्यायालयात गुन्हा शाबित झाल्याने आरोपी भीमराव सिताराम देवकांत याला अतिरिक्त जिल्हा व सत्र न्यायाधीश श्रीमती यु. एल. जोशी यांनी भारतीय दंड विधान संहिता 307 अन्वये सात वर्षे सक्त मजुरी आणि पाच हजार रुपये दंड, व दंड न भरल्यास एक महिन्याची साधी कैद, अशी शिक्षा सुनावली आहे.

सरकार पक्षास पोलीस कॉन्स्टेबल पी. व्ही. भिंगारदेवे यांनी सहकार्य केले.